کربلای مکتبی

او سحر آنلامادی کؤنلو قرا،اینسانلارا
قارداشین سئوگی سی نی، فیکری پارا، اینسانلارا
بیر طرف تاریخ ایلن پارلایاجاق «یئتمیش ایکی»
قارشیدا، قوم بلا، بئینی یارا اینسانلار
کربلا، حادثه نین شاهیدی، آما نیگران!
صف چکیبلر نه یازیق، هاردان هارا، اینسانلار
قارداشین عشقی دیر «عبّاس» علمدار ولی
ایسته ییر بلکه چاتا اصلی یارا، اینسانلار!
بیر طرف گول و چیچک، یئتمیش ایکی اولدوزلار
بیر طرف، حقی چکیر گور نه دارا، اینسانلار
نقل دیر قارداشیلا قارداشین عشقینده اول گون
کربلا مین دفعه لر، گلدی زارا، اینسانلار
یئر و گؤی ماتم باتماق چاغینا لحظه لنیر
گونش ایستیر یارالا آی بئچارا، اینسانلار
کربلا مکتبینین، غیرت و عشقی عباس
یا حسین سسله یه یرک چاتدی یارا، اینسانلار

امیر نصیری (ائلمان)